ಮುದ್ದೇಬಿಹಾಳ : ಹಾಲು ಪೂರೈಸುವ ಗೂಡ್ಸ್ ವಾಹನವನ್ನು ಅಜಾಗರೂಕತೆಯಿಂದ ಚಲಾಯಿಸಿ ಬಸ್‌ಗೆ ಡಿಕ್ಕಿ ಹೊಡೆದ ಆರೋಪದ ಮೇರೆಗೆ ಗೂಡ್ಸ್ ಚಾಲಕನ ವಿರುದ್ಧ ಇಲ್ಲಿನ ಪೊಲೀಸ್ ಠಾಣೆಯಲ್ಲಿ ಗುರುವಾರ ಪ್ರಕರಣ ದಾಖಲಾಗಿದೆ.
ಮುದ್ದೇಬಿಹಾಳ ಪಟ್ಟಣದಿಂದ ತಂಗಡಗಿ ಕಡೆಗೆ ಹಾಲು ತೆಗೆದುಕೊಂಡು ತೆರಳುತ್ತಿದ್ದ ಗೂಡ್ಸ್ ವಾಹನ ಚಾಲಕ ಶ್ರೀಕಾಂತ ಪಡೇಕನೂರ ಅಜಾಗರೂಕತೆಯಿಂದ ಇಲಕಲ್‌ದಿಂದ ಮುದ್ದೇಬಿಹಾಳ ಕಡೆಗೆ ಬರುತ್ತಿದ್ದ ಬಸ್‌ಗೆ ಡಿಕ್ಕಿ ಹೊಡೆಸಿ ಬಸ್‌ನ್ನು ಜಖಂಗೊಳಿಸಿದ್ದು ತನ್ನ ವಾಹನವನ್ನು ಜಖಂ ಮಾಡಿಕೊಂಡು ತಾನು ಗಂಭೀರವಾಗಿ ಗಾಯಗೊಂಡಿದ್ದಾನೆ ಎಂದು ಎನ್‌ಡಬ್ಲೂಕೆಆರ್‌ಟಿಸಿ ಚಾಲಕ ಪುರುಷೋತ್ತಮ ಕಿರಗಿ ಪೊಲೀಸರಿಗೆ ನೀಡಿರುವ ದೂರಿನಲ್ಲಿ ತಿಳಿಸಿದ್ದಾರೆ.
ಮುದ್ದೇಬಿಹಾಳ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ. ಅಪಘಾತದ ರಭಸಕ್ಕೆ ಗೂಡ್ಸ್ ಹಾಗೂ ಬಸ್‌ನ ಮುಂಭಾಗ ಜಖಂಗೊಂಡಿದ್ದು ಗೂಡ್ಸ್ನಲ್ಲಿದ್ದ ಹಾಲು ಚೆಲ್ಲಾಡಿ ರಸ್ತೆ ತುಂಬೆಲ್ಲಾ ಹರಿದಾಡಿತು.
