ಮುದ್ದೇಬಿಹಾಳ : ಗೂಡ್ಸ್ ಅಟೋ ಹಾಗೂ ಕ್ಯಾಂಟರ್ ವಾಹನ ಮುಖಾಮುಖಿ ಡಿಕ್ಕಿ ಹೊಡೆದ ಪರಿಣಾಮ ಅಟೋದಲ್ಲಿದ್ದ ಒರ್ವ ವ್ಯಕ್ತಿ ಸ್ಥಳದಲ್ಲೇ ಸಾವನ್ನಪ್ಪಿ ಅಟೋ ಚಾಲಕ ಗಂಭೀರವಾಗಿ ಗಾಯಗೊಂಡಿರುವ ಘಟನೆ ತಾಲ್ಲೂಕಿನ ಕವಡಿಮಟ್ಟಿ-ಹಿರೇಮುರಾಳ ಮಧ್ಯೆದಲ್ಲಿ ಬರುವ ಡಾಂಬರ್ ಪ್ಲಾಂಟ್ ಹತ್ತಿರ ಶನಿವಾರ ನಡೆದಿದೆ.
ಇನ್ನಷ್ಟು ಸುದ್ದಿಗಳಿಗಾಗಿ ನಮ್ಮ ಟೆಲಿಗ್ರಾಂ ಚಾನೆಲ್ ಗೆ ಸೇರಲು ಈ ಲಿಂಕ್ ಬಳಸಿ: https://t.me/dcgkannada
ಘಟನೆಯಲ್ಲಿ ಚವನಬಾವಿಯಲ್ಲಿ ಕಿರಾಣಿ ಅಂಗಡಿಯನ್ನಿಟ್ಟುಕೊಂಡಿದ್ದ ಕರಿಯಪ್ಪ ಡಿ.ನಾಲತವಾಡ(55) ಸ್ಥಳದಲ್ಲೇ ಅಸುನೀಗಿದರು. ಗೂಡ್ಸ್ ಆಟೋ ಚಾಲಕ ಯಮನಪ್ಪ ಜಗಂಡಭಾವಿ ಅವರಿಗೆ ಗಂಭೀರ ಗಾಯಗಳಾಗಿದ್ದು ಬಾಗಲಕೋಟ ಜಿಲ್ಲಾಸ್ಪತ್ರೆಗೆ ದಾಖಲಿಸಲಾಗಿದೆ.
ಚವನಬಾವಿಯಲ್ಲಿ ಕಿರಾಣಿ ಅಂಗಡಿಯನ್ನಿಟ್ಟಿದ್ದ ಕರಿಯಪ್ಪ ನಾಲತವಾಡ, ಒಂದು ವಾರಕ್ಕಾಗುಷ್ಟು ಕಿರಾಣಿ ಸಂತೆಯನ್ನು ಖರೀದಿಸಿಕೊಂಡು ಆಟೋದಲ್ಲಿ ಹಾಕಿಕೊಂಡು ತಮ್ಮೂರಿನತ್ತ ಹೊರಟಿದ್ದ ವೇಳೆ ಹಿರೇಮುರಾಳ-ಕವಡಿಮಟ್ಟ ಮಾರ್ಗ ಮಧ್ಯೆ ಯಮನ ರೂಪದಲ್ಲಿ ಬಂದ ಕ್ಯಾಂಟರ್ ವಾಹನ ಡಿಕ್ಕಿ ಹೊಡೆದು ಅವರ ಜೀವನದ ಸಂತೆಯನ್ನೇ ಮುಗಿಸಿದ್ದು ಎಂಥವರನ್ನು ಮರುಗುವಂತೆ ಮಾಡಿತು.
ಘಟನಾ ಸ್ಥಳದಲ್ಲಿ ಜೀರಾ ಸೋಡಾ ಬಾಟಲಿಗಳು, ಶೇಂಗಾ, ರವೆ, ಅವಲಕ್ಕಿ, ಇನ್ನೂ ಗಂಟು ಬಿಚ್ಚದೇ ಇದ್ದ ಬಳ್ಳೊಳ್ಳಿ,ಶೇಂಗಾ ಇನ್ನೀತರ ಸಾಮಗ್ರಿ ಇದ್ದ ಚೀಲದ ಮೇಲಿನ ರಕ್ತದ ಹನಿಗಳು ಘಟನೆಯ ಭೀಕರತೆಯನ್ನು ಎತ್ತಿ ತೋರಿಸುವಂತಿತ್ತು.
ಅಟೋ ಚಾಲಕ ಯಮನಪ್ಪ ಜಗಂಡಭಾವಿ ಪರಿಸ್ಥಿತಿ ಗಂಭೀರವಾಗಿದ್ದು ಅವರ ತಾಯಿ ಮಗನ ಪರಿಸ್ಥಿತಿಗೆ ಕಣ್ಣೀರು ಹಾಕುತ್ತಿದ್ದಾರೆ.ಅಪಘಾತಕ್ಕೀಡಾದ ಆಟೋದ ಮೇಲೆ ಹುಟ್ಟು ಉಚಿತ, ಸಾವು ಖಚಿತ, ನೀನೇ ಶಾಶ್ವತ ಬರಹ ಮಾರ್ಗ ಮಧ್ಯೆದಲ್ಲಿನ ಜನರ ಗಮನ ಸೆಳೆಯಿತು.
ಪಿಎಸ್‌ಐ ಸಂಜಯ ತಿಪರೆಡ್ಡಿ ಘಟನಾ ಸ್ಥಳಕ್ಕೆ ಭೇಟಿ ನೀಡಿದ್ದಾರೆ. ಅಪಘಾತಕ್ಕೆ ಕಾರಣವಾದ ಕ್ಯಾಂಟರ್ ಚಾಲಕನನ್ನು ಪೊಲೀಸರು ವಶಕ್ಕೆ ಪಡೆದಿದ್ದಾರೆ.
ಇದನ್ನೂ ಓದಿ: Gold Price Today : ಚಿನ್ನ ಪ್ರಿಯರಿಗೆ ಇದು ಶಾಕಿಂಗ್ ನ್ಯೂಸ್!
ಮುದ್ದೇಬಿಹಾಳ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.
