ಕೊಪ್ಪಳ: ಯಾದಗಿರಿಯಲ್ಲಿ ಮೃತಪಟ್ಟ ಪಿಎಸ್ಐ ಪರಶುರಾಮ ಅವರ ಸ್ವಗ್ರಾಮ ಸೋಮನಾಳದಲ್ಲಿರುವ ಪರಶುರಾಮ ಮನೆಗೆ ಗೃಹ ಸಚಿವ ಪರಮೇಶ್ವರ ಭೇಟಿ ನೀಡಿದರು.
ಈ ಗೃಹ ಸಚಿವರು ಮನೆಯ ಒಳಗೆ ಹೋಗುತ್ತಿದ್ದಂತೆ ಪೊಲೀಸರು ಮಾಧ್ಯಮದವರಿಗೆ ಪ್ರವೇಶ ನಿರಾಕರಣೆ ಮಾಡಿ, ಮನೆಯ ಬಾಗಿಲು ಹಾಕಿದರು. ಈ ವೇಳೆ ಮಾಧ್ಯಮ ಪ್ರತಿನಿಧಿಗಳು ಮತ್ತು ಪೊಲೀಸರ ನಡುವೆ ಮಾತಿನ ಚಕಮಕಿ ನಡೆಯಿತು.
ಇದಕ್ಕೂ ಮುನ್ನ ಮಾತನಾಡಿದ್ದ ಕುಟುಂಬಸ್ಥರು ಘೇರಾವ್ ಹಾಕುವ ಎಚ್ಚರಿಕೆ ನೀಡಿದ್ದರು. ಪರಶುರಾಮ್ ಸಾವಿಗೆ ಕಾರಣರಾದ ಶಾಸಕ ಚೆನ್ನಾರೆಡ್ಡಿ ಪಾಟೀಲ್ ಹಾಗೂ ಅವರ ಮಗನ ಬಂಧನ ಮಾಡದೆ ಸಚಿವರು ತಮ್ಮ ಮನೆಗೆ ಬರೋದು ಬೇಡ. ಒಂದು ವೇಳೆ ಬಂಧಿಸದ ಬಂದರೆ, ಗೃಹ ಸಚಿವರಿಗೇ ಘೇರಾವ್ ಹಾಕ್ತಿವಿ ಎಂದು ಕುಟುಂಬಸ್ಥರು ಪಟ್ಟು ಹಿಡಿದಿದ್ದರು.
ಪರಶುರಾಮ ಸಾವಿಗೆ ಕಾರಣವಾದವರನ್ನ ರಕ್ಷಣೆ ಮಾಡಿ ನಮಗೆ ಸಾಂತ್ವನ ಹೇಳೋದು ಬೇಡ. ಅವರನ್ನ ಬಂಧನ ಮಾಡಿ ನಮ್ಮ ಮನೆಗೆ ಬರೋದಾದ್ರೆ ಬರಲಿ. ಸಿಐಡಿ ತನಿಖೆ ಮೇಲೆ ನಮಗೆ ನಂಬಿಕೆ ಇಲ್ಲ. ಸಿಬಿಐಗೆ ಪ್ರಕರಣ ನೀಡಬೇಕು. ನಾವು ಯಾರೂ ಸಿಬಿಐ ತನಿಖೆ ಮಾಡಿ ಅಂತ ಹೇಳಿಲ್ಲ ಎಂದು ಕುಟುಂಬಸ್ಥರು ಆಕ್ರೋಶ ವ್ಯಕ್ತಪಡಿಸಿದ್ದರು.
