ಮುದ್ದೇಬಿಹಾಳ : ಕೃಷ್ಣಾ ನದಿ ತೀರದಲ್ಲಿ ಬರುವ ಬಹುತೇಕ ಗ್ರಾಮಗಳಲ್ಲಿ ಫ್ಲೋರೈಡ್ ಅಂಶವಿರುವ ನೀರು ಇದ್ದು ಸಮಸ್ಯೆಯಿಂದ ಬಳಲುತ್ತಿರುವ ನನ್ನ ಭಾಗದ ಜನರಿಗೆ ಸೇವೆ ಒದಗಿಸಲು ಅವಕಾಶ ದೊರೆತಿರುವುದು ನನ್ನ ಸೌಭಾಗ್ಯ ಎಂದು ರಾಣಿಬೆನ್ನೂರು ಭವಾನಿ ಹಾಸ್ಪಿಟಲ್ ಮುಖ್ಯಸ್ಥ ಡಾ.ತಿರುಪತಿ ನಾಯಕ ಹೇಳಿದರು.

ತಾಲ್ಲೂಕಿನ ಯರಝರಿ ಶ್ರೀ ಯಲ್ಲಾಲಿಂಗೇಶ್ವರ ಮಠದಲ್ಲಿ ಶನಿವಾರ ಶ್ರೀದೇವಿ ನವರಾತ್ರೋತ್ಸವ ಅಂಗವಾಗಿ ರಾಣೆಬೆನ್ನೂರಿನ ಶ್ರೀಭವಾನಿ ಹಾಸ್ಪಿಟಲ್ ಹಾಗೂ ಕಾಳಜಿ ಸಮುದಾಯ ಆರೋಗ್ಯ ಕೇಂದ್ರದ ಸಹಯೋಗದೊಂದಿಗೆ ಏರ್ಪಡಿಸಿದ್ದ ಮೂಳೆ ,ಕೀಲು, ಖನಿಜ ಸಾಂದ್ರತೆ ಪರೀಕ್ಷೆ ಹಾಗೂ ಉಚಿತ ಔಷಧಿ ವಿತರಣಾ ಕಾರ್ಯಕ್ರಮದಲ್ಲಿ ಅವರು ಮಾತನಾಡಿದರು.

ನಾನು ಹುಟ್ಟಿದ್ದು ಹುಲ್ಲೂರ ತಾಂಡಾದಲ್ಲಿ. ನಮ್ಮ ಅಜ್ಜ ಶೆಟ್ಟೆಪ್ಪ ನಾಯಕರು ಹಾಗೂ ನಮ್ಮ ತಂದೆ ನಿವೃತ್ತ ಪೊಲೀಸ ಅಧಿಕಾರಿಯಾದ ಶಿವಾನಂದ ನಾಯಕರ ಸಮಾಜ ಸೇವೆ,ಮಾರ್ಗದರ್ಶನದಲ್ಲಿ ನಾನು ಮುನ್ನಡೆದಿದ್ದೇನೆ. ಎಲಬು ಮತ್ತು ಕೀಲು ತಜ್ಞನಾಗಿ ಈ ಭಾಗದ ಜನರಲ್ಲಿ ಮೂಳೆ, ಕೀಲು ಖನಿಜ ಸಾಂದ್ರತೆ ಬಗ್ಗೆ ಜಾಗೃತಿ ಮತ್ತು ಅದರಿಂದ ಬಳಲುತ್ತಿರುವ ಜನರಿಗೆ ಆರೋಗ್ಯ ಸೇವೆ ಸಲ್ಲಿಸಲು ಈ ಯರಝರಿ ಜಾತ್ರೆಯ ಸಂದರ್ಭದಲ್ಲಿ ಉಚಿತ ಆರೋಗ್ಯ ಶಿಬಿರ ಮಾಡಿದ್ದೇವೆ ಎಂದರು.

ಕಾರ್ಯಕ್ರಮ ಉದ್ಘಾಟಿಸಿದ ಯಲ್ಲಾಲಿಂಗೇಶ್ವರ ಮಠದ ಮಲ್ಲಾರಲಿಂಗ ಸ್ವಾಮೀಜಿ, ನಮ್ಮ ಮಠದ ಭಕ್ತರು,ಯುವ ವೈದ್ಯರಾಗಿರುವ ಡಾ.ತಿರುಪತಿ ನಾಯಕ ಅವರು ತಮ್ಮ ತಂಡದೊAದಿಗೆ ಮಠಕ್ಕೆ ಆಗಮಿಸಿ ಗ್ರಾಮೀಣ ಜನರಿಗೆ ಉಚಿತವಾಗಿ ಮೂಳೆ, ಕೀಲು ಸಾಂದ್ರತೆ ಪರೀಕ್ಷೆಯ ಜೊತೆಗೆ ಅನೇಕ ಕಾಯಿಲೆಗಳ ಪರೀಕ್ಷೆ ಮತ್ತು ಉಚಿತ ಔಷಧ ಮಾತ್ರೆಗಳನ್ನು ನೀಡುತ್ತಿರುವುದು ಪ್ರಶಂಸನೀಯ ಕಾರ್ಯ ಎಂದರು.

ನಿವೃತ್ತ ಪೂಲೀಸ್ ಅಧಿಕಾರಿ ಶಿವಾನಂದ ನಾಯಕ,ತಾಪಂ ಮಾಜಿ ಅಧ್ಯಕ್ಷ ಮುತ್ತಣ್ಣ ಹುಗ್ಗಿ,ಯುವ ಮುಖಂಡ ಮಹಾಂತೇಶ ಪಟ್ಟಣದ ಮಾತನಾಡಿ, ಆರೋಗ್ಯ ಶಿಬಿರಗಳು ಬಡ ಜನರಿಗೆ ಆಸರೆಯಾಗಿವೆ ಎಂದರು.

ಆರೋಗ್ಯ ಶಿಬಿರದಲ್ಲಿ ಡಾ.ಪ್ರದೀಪ ಹೆರಕಲ್,ಡಾ.ಸುನಿಲ್ ನಾಯಕ,ಡಾ.ಹರೀಶ್, ಡಾ.ಸಾಯಿನಾಥ್, ಡಾ.ಗೌತಮ್ ಮತ್ತು ಕಾಳಗಿ ಸರಕಾರಿ ಸಮುದಾಯ ಆಸ್ಪತ್ರೆಯ ವೈದ್ಯ ಡಾ.ಅಬ್ದುಲ್‌ಜಬ್ಬಾರ ರಂಜಣಗಿ,ಸಿಬ್ಬoದಿ ಭಾಗವಹಿಸಿ ಆರೋಗ್ಯ ತಪಾಸಣೆ ಮಾಡಿದರು.ಗ್ರಾಪಂ ಮಾಜಿ ಸದಸ್ಯ ಶಿವಾನಂದ ಲಮಾಣಿ,ಮುಖಂಡರಾದ ಮಲ್ಲು ನಾಯಕ,ಶೇಖರ ನಾಯಕ,ಹಣಮಂತ ದೊಡಮನಿ ಸೇರಿದಂತೆ ಅನೇಕರು ಇದ್ದರು.