ಮುದ್ದೇಬಿಹಾಳ : ನಮ್ಮ ತಾಂಡಾಗಳಲ್ಲಿರುವ ಬಂಜಾರಾ ಜನಾಂಗದವರಲ್ಲಿ ಕೆಲವರು ಮತಾಂತರದ ಪಿಡುಗಿಗೆ ಬಲಿಯಾಗುತ್ತಿದ್ದಾರೆ.ಅಂತಹ ಪ್ರಕರಣಗಳು ಹೆಚ್ಚಬಾರದೆಂಬ ಉದ್ದೇಶದಿಂದ ನಮ್ಮ ಧರ್ಮ,ಜನಾಂಗದ ಜಾತ್ರೆ ಉತ್ಸವಗಳಲ್ಲಿ ಮತಾಂತರ ಪಿಡುಗಿನ ಕುರಿತು ಜಾಗೃತಿ ಮೂಡಿಸುವ ಕಾರ್ಯ ಮಾಡಲಾಗುತ್ತಿದೆ ಎಂದು ಎಸ್.ಎಸ್.ಶಿವಾಚಾರ್ಯ ಕಾಲೇಜಿನ ಆಡಳಿತಾಧಿಕಾರಿ,ಬಂಜಾರಾ ಸಮಾಜದ ಮುಖಂಡ ರವಿ ಎನ್.ನಾಯಕ ಹೇಳಿದರು.
ತಾಲೂಕಿನ ಕೋಳೂರು ತಾಂಡಾದಲ್ಲಿ ನವರಾತ್ರಿ ದಸರಾ ಹಬ್ಬದ ಅಂಗವಾಗಿ ಶ್ರೀ ದುರ್ಗಾದೇವಿ ಹಾಗೂ ಶ್ರೀ ಸಂತಸೇವಾಲಾಲ ಮಹಾರಾಜರ ಜಾತ್ರಾ ಮಹೋತ್ಸವದ ಅಂಗವಾಗಿ ಹಮ್ಮಿಕೊಂಡಿದ್ದ ದೇವಿಯ ಪಲ್ಲಕ್ಕಿ ಮೆರವಣಿಗೆಯಲ್ಲಿ ತಮ್ಮನ್ನು ಭೇಟಿಯಾದ ಸುದ್ದಿಗಾರರೊಂದಿಗೆ ಮಾತನಾಡಿದರು.
ನಮ್ಮ ದುರ್ಗಾದೇವಿಯ ಮೂಲ ಪೀಠ ಬಾಗಲಕೋಟೆ ಶಿರೂರು ತಾಂಡಾದ ನೀಲಾನಗರದಲ್ಲಿದೆ. ನಮ್ಮ ತಾಂಡಾದಲ್ಲಿ ಪ್ರತಿ ಮೂರು ವರ್ಷಕ್ಕೊಮ್ಮೆ ಗ್ರಾಮದೇವತೆ ದುರ್ಗಾದೇವಿ ಹಾಗೂ ಬಂಜಾರ ಸಮಾಜದ ಸಿದ್ದಿಪುರುಷ ಸಂತಸೇವಾಲಾಲ ಮಹಾರಾಜರ ಜಾತ್ರೆ ಆಚರಿಸುತ್ತೇವೆ. ಆಧುನಿಕ ಭರಾಟೆಯಲ್ಲಿ ನಮ್ಮ ಸಮಾಜದ ಮೂಲ ಸಂಪ್ರದಾಯಗಳು ಆಚರಣೆಗಳು ನಶಿಸುತ್ತಿದ್ದು ಅದನ್ನು ಉಳಿಸಲು ಇಂತಹ ಹಬ್ಬ ಹರಿದಿನಗಳಲ್ಲಿ ವಿಶೇಷವಾಗಿ ನಮ್ಮ ಆಚರಣೆ ಮಾಡುವ ಮೂಲಕ ಮುಂದಿನ ತಲೆ ಮಾರಿಗೆ ಪರಿಚಯಿಸುವ ಕಾರ್ಯ ಮಾಡಿದ್ದೇವೆ ಎಂದರು.
ನಮ್ಮ ಪೂರ್ವಜರು ದೇವಿಯ ಮೇಲೆ ಇಟ್ಟಿರುವ ನಂಬಿಕೆಯಿAದ ಒಳ್ಳೆಯದಾಗಿದೆ.ನಮ್ಮ ಮನೆಯಿಂದಲೇ ಪಲ್ಲಕ್ಕಿ ಮೆರವಣಿಗೆ ಸಾಗುತ್ತದೆ.ಜಿಪಂ ಮಾಜಿ ಸದಸ್ಯ ಚಿದಾನಂದ ಸೀತಿಮನಿ ಅವರ ಮನೆಯಿಂದ ದೇವಿಯ ಚಿನ್ನಾಭರಣಗಳ ಮೆರವಣಿಗೆ ಮೂಲಕ ದೇವಸ್ಥಾನಕ್ಕೆ ತರಲಾಗುತ್ತದೆ ಎಂದರು.
ಸೋಮದೇವರಹಟ್ಟಿ ತಾಂಡಾದ ಜಗನು ಮಹಾರಾಜ ಮಾತನಾಡಿ, ಬಂಜಾರ ಸಮಾಜದಲ್ಲಿ ವಿಶೇಷವಾಗಿ ನವರಾತ್ರಿ ಹಬ್ಬವನ್ನು ಶ್ರದ್ದಾಭಕ್ತಿಯಿಂದ ಆಚರಿಸಲಾಗುತ್ತದೆ.ನಮ್ಮ ಸಮಾಜದ ಬಾಂಧವರು ಮದುವೆ,ಹಬ್ಬಗಳ ಆಚರಣೆಯ ನೆಪದಲ್ಲಿ ಮಾಡುವ ದುಂದುವೆಚ್ಚಕ್ಕೆ ಕಡಿವಾಣ ಹಾಕಬೇಕು.ಮತಾಂತರ ಪಿಡುಗು ಹಾಗೂ ವರದಕ್ಷಿಣೆ, ಮದ್ಯಪಾನ ವಿರುದ್ಧ ಜಾಗೃತಿ ಮೂಡಿಸುತ್ತಿದ್ದೇವೆ.ಕೋಳೂರು ತಾಂಡಾದ ನಿವಾಸಿಗಳು ಎಲ್ಲರೂ ಒಗ್ಗಟ್ಟಾಗಿ ಸಹೋದರರಂತೆ ಜೀವನ ನಡೆಸಬೇಕೆಂದು ಹೇಳಿದರು.
ಈ ಸಂದರ್ಭದಲ್ಲಿ ಜಿಪಂ ಮಾಜಿ ಸದಸ್ಯ,ಟಿಎಪಿಸಿಎಂಎಸ್ ಉಪಾಧ್ಯಕ್ಷರಾದ ಚಿದಾನಂದ ಎಂ.ಸೀತಿಮನಿ,ಮುಖAಡರಾದ ತುಳಜಾರಾಮ್ ದಿಂಡವಾರ,ಚAದ್ರಶೇಖರ ಸೀತಿಮನಿ,ಶಾಂತಾರಾಮ ಮೇಲ್ಮನಿ,ಸಂತೋಷ ದಿಂಡವಾರ, ಶಶಿಲ್ ಜಾಧವ,ಮೋತಿಲಾಲ್ ಲಮಾಣಿ,ಹರೀಶ ಜಾಧವ, ಚಂದ್ರಶೇಖರ ನಾಯಕ,ಜಯರಾಮ್ ನಾಯಕ, ಸಂತೋಷ ನಾಯಕ,ಲಕ್ಷ್ಮಣ ಲಮಾಣಿ,ಶಿವಾನಂದ ಲಮಾಣಿ, ಸೋಮಸಿಂಗ್ ಸೀತಿಮನಿ,ಸುಜಾತಾ ಜಾಧವ,ಪ್ರಹ್ಲಾದ ರಾಠೋಡ,ಮಾನಸಿಂಗ್ ರಾಠೋಡ, ಆನಂದ ಚವ್ಹಾಣ, ಕೇಶಪ್ಪ ಸೀತಿಮನಿ,ಆರ್.ವಿ. ತೋಟದ, ಶಾಂತಪ್ಪ ರಾಠೋಡ ಸೇರಿದಂತೆ ತಾಂಡಾದ ನಿವಾಸಿಗಳು ಗಣ್ಯರು ಮಹಿಳೆಯರು ಮಕ್ಕಳು ಯುವಕರು ಹೆಚ್ಚಿನ ಸಂಖ್ಯೆಯಲ್ಲಿ ಭಾಗವಹಿಸಿದ್ದರು.
