ಮುದ್ದೇಬಿಹಾಳ : ರಾಜ್ಯ ಕಾಂಗ್ರೆಸ್ ಸರ್ಕಾರ ಕಳೆದೆರಡೂವರೆ ವರ್ಷಗಳಿಂದ ಗುತ್ತಿಗೆದಾರರ ಬಾಕಿ ಬಿಲ್ ಪಾವತಿಸದೇ ಇರುವ ಕಾರಣದಿಂದ ಗುತ್ತಿಗೆದಾರರ ಕುಟುಂಬಗಳು ತೀವ್ರ ಸಂಕಷ್ಟದಲ್ಲಿವೆ ಎಂದು ಗುತ್ತಿಗೆದಾರರ ಸಂಘದ ಜಿಲ್ಲಾ ಪ್ರಧಾನ ಕಾರ್ಯದರ್ಶಿ ಆಯ್.ಎಂ.ಪಟ್ಟಣಶೆಟ್ಟಿ ಹೇಳಿದರು.
ಪಟ್ಟಣದ ಹೇಮರೆಡ್ಡಿ ಮಲ್ಲಮ್ಮ ಸಭಾಭವನದಲ್ಲಿ ಭಾನುವಾರ ತಾಲ್ಲೂಕು ಗುತ್ತಿಗೆದಾರರ ಸಂಘದ ಪದಾಧಿಕಾರಿಗಳ ಪೂರ್ವಭಾವಿ ಸಭೆಯಲ್ಲಿ ಅವರು ಮಾತನಾಡಿದರು.
ರಾಜ್ಯ ಸರ್ಕಾರದಲ್ಲಿ 30 ಸಾವಿರ ಕೋಟಿಗೂ ಅಧಿಕ ಬಿಲ್ ಪಾವತಿಸುವುದು ಬಾಕಿ ಉಳಿಸಿಕೊಂಡಿರುವುದರಿAದ ಎಲ್ಲ ಹಂತದ ಗುತ್ತಿಗೆದಾರರಿಗೆ ಸಂಕಷ್ಟ ತಂದೊಡ್ಡಿದೆ.ಇದು ಯಾವುದೇ ಪಕ್ಷದ ಪ್ರಾಯೋಜಿತ ಹೋರಾಟವಲ್ಲ.ಸರ್ಕಾರದ ಕಣ್ಣು ತೆರೆಸಲು ಮಾ.6 ರಂದು ಬೆಂಗಳೂರಿನ ಪ್ರೀಡಂ ಪಾರ್ಕ್ನಲ್ಲಿ ಹೋರಾಟ ಹಮ್ಮಿಕೊಂಡಿದ್ದೇವೆ.ಬಿಲ್ ಈಗ ಮಾಡುತ್ತಾರೆ,ಆಗ ಮಾಡುತ್ತಾರೆ ಎಂದು ಜಾತಕ ಪಕ್ಷಿಗಳಂತೆ ಕಾಯ್ದು ಕೂತು ಸುಸ್ತಾಗಿದ್ದೇವೆ.ಸರ್ಕಾರದ ಕೆಲಸಗಳನ್ನು ಮಾಡಲು ಮಾಡಿದ ಸಾಲದ ಬಡ್ಡಿ ಕಟ್ಟಲು ತಮ್ಮ ಕುಟುಂಬ ಸದಸ್ಯರ ಬಂಗಾರದ ಆಭರಣಗಳನ್ನು ಒತ್ತೆ ಇಡುವ ದುಸ್ಥಿತಿ ಗುತ್ತಿಗೆದಾರರಿಗೆ ಬಂದಿದೆ.ನಮ್ಮದು ಗುತ್ತಿಗೆದಾರರ ಸಮಾಜ.ಯಾವುದೇ ಪಕ್ಷ,ಪಂಗಡ ಎಂಬುದಿಲ್ಲ.ವಿಜಯಪುರ ಜಿಲ್ಲೆಯಿಂದ ಸುಮಾರು ಒಂದು ಸಾವಿರ ಜನ ಗುತ್ತಿಗೆದಾರರು ಬೆಂಗಳೂರಿನ ಹೋರಾಟಕ್ಕೆ ತೆರಳಲಿದ್ದಾರೆ ಎಂದು ತಿಳಿಸಿದರು.
ಗುತ್ತಿಗೆದಾರರ ಜಿಲ್ಲಾ ಸಂಘದ ನಿರ್ದೇಶಕ ಆರ್.ಬಿ.ಅಸ್ಕಿ ಮಾತನಾಡಿ, ಗುತ್ತಿಗೆದಾರರ ಹಲವು ಬೇಡಿಕೆಗಳನ್ನು ಈಡೇರಿಸಲು ಈ ಹೋರಾಟ ಮಾಡಲಾಗುತ್ತಿದೆ.ಇದು ಯಾವುದೆ ಪಕ್ಷದ ವಿರುದ್ದ ಅಪಪ್ರಚಾರವಲ್ಲ.ನಮ್ಮ ಬಾಕಿ ಬಿಲ್ ಪಾವತಿಸಬೇಕು.ಇಎಂಡಿ ಸೌಲಭ್ಯ ಕೊಡುತ್ತಿಲ್ಲ.ಸಿಬಿಎಫ್ 4-5 ಸಾವಿರ ಕೋಟಿ ರೂ.ಬಾಕಿ ಉಳಿಸಿಕೊಳ್ಳಲಾಗಿದೆ.ಎಫ್.ಎಸ್.ಡಿಯನ್ನು ಶೇ.2ರಷ್ಟು ತುಂಬಿಸಿಕೊಳ್ಳಬೇಕು.ಅನುದಾನ ಲಭ್ಯತೆ ಆಧಾರದಲ್ಲಿ ಕಾಮಗಾರಿಗೆ ಟೆಂಡರ್ ಕರೆಯಬೇಕು ಎಂದು ಹೇಳಿದರು.
ಗುತ್ತಿಗೆದಾರರ ಸಂಘದ ತಾಲ್ಲೂಕು ಘಟಕದ ಅಧ್ಯಕ್ಷ ಸುರೇಶಗೌಡ ಪಾಟೀಲ ಇಂಗಳಗೇರಿ ಮಾತನಾಡಿ, ನಾವು ಬಾಕಿ ಉಳಿದಿರುವ ಬಿಲ್ ಪಾವತಿಸುವಂತೆ ಸರ್ಕಾರದ ಮೇಲೆ ಒತ್ತಡ ಹೇರುವ ಕಾರ್ಯ ಗುತ್ತಿಗೆದಾರರು ಮಾಡುತ್ತಿದ್ದೇವೆ.ಇದು ಶಾಂತಿಯುತ ಹೋರಾಟವಾಗಿದ್ದು ಬಿಲ್ ಪಾವತಿಗೆ ಕ್ರಮ ಜರುಗಿಸದಿದ್ದರೆ ಎಲ್ಲ ಕೆಲಸಗಳನ್ನು ಸ್ಥಗಿತಗೊಳಿಸಿ ಹೋರಾಟವನ್ನು ಉಗ್ರಸ್ವರೂಪಕ್ಕೆ ಬದಲಾಯಿಸುವ ಕುರಿತು ಚಿಂತನೆ ನಡೆಸಲು ರಾಜ್ಯ ಸಂಘ ನಿರ್ಧರಿಸಿದೆ ಎಂದು ಹೇಳಿದರು.
ಗುತ್ತಿಗೆದಾರರ ಸಂಘದ ಸದಾನಂದ ಕುಂಬಾರ, ಆರ್.ಎಂ.ಮಾವಿನಗಿಡದ, ಸಿ.ಎಸ್.ನ್ಯಾಮಣ್ಣವರ, ಎ.ಬಿ.ನರಸರೆಡ್ಡಿ, ತಾಲ್ಲೂಕಿನ ಗುತ್ತಿಗೆದಾರರಾದ ರಾಯನಗೌಡ ತಾತರೆಡ್ಡಿ, ಬಸವರಾಜ ಇಸ್ಲಾಂಪೂರ,ಶ್ರೀಶೈಲ ಮರೋಳ, ರಾಜುಗೌಡ ಕೊಂಗಿ,ಸಚಿನಗೌಡ ಪಾಟೀಲ,ಶ್ರೀಕಾಂತಗೌಡ ಪಾಟೀಲ,ಯಲ್ಲಪ್ಪ ಚಲವಾದಿ,ಶ್ರೀನಿವಾಸ ಗೌಂಡಿ ಹಲವರು ಪಾಲ್ಗೊಂಡಿದ್ದರು.
